परीक्षांचे पेपर्स फुटणे आणि लाखो विद्यार्थ्यांच्या भवितव्यावर नांगर फिरणे...
- dhadakkamgarunion0
- 10 hours ago
- 3 min read
🖋️ *अभिजीत राणे लिहितात*
परीक्षांचे पेपर्स फुटणे आणि लाखो विद्यार्थ्यांच्या भवितव्यावर नांगर फिरणे ही आता देशात आणि राज्यात एक अत्यंत भीषण परंपरा बनली आहे. NEET २०२४ चा गदारोळ ताजा असतानाच २०२५ मध्येही तीच पुनरावृत्ती झाली, तरीही पेपर फोडणाऱ्या माफियांचे धंदे आजही उजळ माथ्याने सुरू आहेत. त्यातच महाराष्ट्रात TET चा पेपर फुटून गोंधळात भर पडली. यावर उपाय शोधण्याऐवजी 'काँग्रेसच्या काळातही हेच व्हायचे' असे सांगून जबाबदारी ढकलणे हे बालिशपणाचे आहे. काँग्रेसच्या याच अनास्थेला कंटाळून जनतेने तुम्हाला सत्ता दिली होती, याचे भान सरकारने ठेवावे. 'परीक्षा पे चर्चा' करून ताणतणावावर भाषणे देणाऱ्या राज्यकर्त्यांना प्रत्यक्ष पेपर फुटल्यानंतर हवालदिल झालेल्या विद्यार्थ्यांच्या शंकांचे निरसन करण्यासाठी एकही 'चर्चा' आयोजित करावीशी वाटू नये, याहून मोठे दुर्दैव ते काय? विद्यार्थ्यांच्या भविष्याशी खेळणाऱ्या या निष्क्रियतेचा तीव्र निषेध व्हायलाच हवा.
🔽
🖋️ *अभिजीत राणे लिहितात*
पेपरफुटीच्या गंभीर विषयावरून सुरू झालेल्या आंदोलनाला राजकीय हेतूने हॅक केले जाणे अत्यंत चिंताजनक आणि निषेधार्ह आहे. मूळ प्रश्न परीक्षांमधील पारदर्शकता, दोषींवर कठोर कारवाई आणि चोरीचा पेपर विकत घेणाऱ्या पालकांची जबाबदारी निश्चित करण्याचा होता. मात्र, डाव्या व अराजकवादी तत्त्वांनी प्रवेश करून या वैध आंदोलनाची दिशा बदलली; 'संविधान' आणि 'ब्राह्मणवाद' यांसारखे विषय आणून विद्यार्थ्यांच्या मूळ प्रश्नाला बाजूला सारले गेले. हिंसेला खतपाणी घालून, असत्य व द्वेषाच्या आधारे तरुणांच्या संतापाचा वापर वर्गकलहासाठी करणे हा सांस्कृतिक मार्क्सवादाचाच एक भाग आहे. गांधीजी आणि डॉ. बाबासाहेब आंबेडकरांच्या विचारांची पायमल्ली करत अशा प्रकारे हिंसक मार्गाने व्यवस्था भ्रष्ट करण्याचा प्रयत्न धोक्याचा आहे. विद्यार्थ्यांनी सजग राहून स्वतःचे आंदोलन हॅक होण्यापासून वाचवले पाहिजे आणि सरकारनेही वास्तविक समस्यांवर तातडीने मार्ग काढला पाहिजे.
🔽
🖋️ *अभिजीत राणे लिहितात*
जींद-सोनीपत मार्गावर सुरू झालेली हायड्रोजन ट्रेन ही हरित क्रांतीची मोठी अचिव्हमेंट आहे की तुघलकी निर्णय, असा सवाल या विश्लेषणातून उपस्थित केला गेला आहे. 'हायड्रोजन फॉर हेरिटेज' धोरणांतर्गत ३५ हेरिटेज मार्गांची घोषणा झाली असताना, पहिला पायलट प्रोजेक्ट बिगर-हेरिटेज आणि ब्रॉडगेज असलेल्या जींद-सोनीपत ट्रॅकवर का राबवला गेला? ४३० किलो हायड्रोजननिर्मिती व साठवणुकीसाठी २४ हजार युनिट वीज लागते, ज्या विजेवर इलेक्ट्रिक ट्रेन १२०० किमी धावू शकते; पण हायड्रोजनमुळे ती केवळ ४२० किमीच चालणार आहे. म्हणजे अधिक वीज वापरून कमी ऊर्जा मिळवणे हे आर्थिकदृष्ट्या अयोग्य ठरते. ९० कोटींत हा ट्रॅक इलेक्ट्रिक झाला असता, तिथे एका ट्रेनच्या रूपांतरासाठी ११२ कोटींचा खर्च झाला. कंपन्यांच्या व्यावसायिक करारांपाई चुकीच्या ट्रॅकवर हा अवाजवी प्रयोग करून हेरिटेजचे केवळ नाव पुढे केले गेल्याचा आरोप यात केला आहे.
🔽
🖋️ *अभिजीत राणे लिहितात*
दिल्लीच्या जंतरमंतरवर विद्यार्थ्यांच्या न्याय्य हक्कांसाठी सुरू झालेले आंदोलन डाव्या विचारसरणीच्या आणि अराजकवादी घटकांनी हायजॅक केल्याचे चित्र अत्यंत चिंताजनक आहे. परीक्षा पद्धतीतील पारदर्शकतेची मागणी बाजूला सारून मंचावर देशविरोधी घोषणा दिल्या गेल्या, ज्याने लोकशाही व्यवस्थेलाच आव्हान दिले आहे. जेव्हा अशी आंदोलने मूळ मार्गापासून भरकटतात आणि राजकीय किंवा अराजक वळण घेतात, तेव्हा त्याचा थेट तोटा सामान्यांना व प्रामाणिक विद्यार्थ्यांना सहन करावा लागतो. आंदोलनांचे असे अवमूल्यन झाले तर सरकारला बळाचा वापर करून आवाज दाबण्याचे हक्क आयते मिळतात, ज्यामुळे भविष्यातील शांततापूर्ण आंदोलनांच्या मूलभूत अधिकारालाच गदा येते. विद्यार्थ्यांच्या हिताचा मुखवटा घालून देशात अराजक माजवू पाहणाऱ्या अशा प्रवृत्तींचा वेळीच बंदोबस्त करणे हे आपल्या लोकशाहीच्या स्वास्थ्यासाठी आणि उज्ज्वल भविष्यासाठी अत्यंत आवश्यक आहे.
🔽
🖋️ *अभिजीत राणे लिहितात*
राममंदिरातील चोरीच्या घटनेवरून नागरिकांनी उगाच संतापून आपला वेळ वाया घालवू नये,उलट याकडे एका वेगळ्या दृष्टिकोनातून पहा. हे मंदिर ट्रस्ट धर्मादाय आयुक्तांकडे (Charity Commissioner) नोंदणीकृत नसल्याने त्याचा थेट करदात्यांच्या (Taxpayers) पैशांशी कोणताही संबंध येत नाही. त्यामुळे सामान्य नागरिकांचे कोणतेही आर्थिक नुकसान झालेले नाही. ज्यांनी मोठी दाने दिली आहेत, त्यांना राग येणे स्वाभाविक असू शकते आणि ते दान देणे बंद करू शकतात. जसे काही मुस्लिम, ख्रिश्चन संस्था किंवा आरएसएस आणि अगदी 'पीएम केअर फंड' देखील कॅग (CAG) च्या ऑडिट कक्षेत येत नाहीत, तसेच या संस्थांचेही आहे. त्यामुळे अशा संस्थांना ना दान द्या, ना त्यांच्याकडे हिशोब मागा. उगीच या विषयावरून स्वतःचा मनस्ताप करून न घेता नागरिकांनी आनंदात राहावे, असा सल्ला यातून दिला आहे.
🔽
Comments