कर्नाटक कॅडरच्या 2000 बॅचच्या IPS अधिकारी...
- dhadakkamgarunion0
- 8 minutes ago
- 3 min read
🖋️ *अभिजीत राणे लिहितात*
कर्नाटक कॅडरच्या 2000 बॅचच्या IPS अधिकारी रूपा मोदगील यांची कारकीर्द म्हणजे दबावापुढे न झुकणाऱ्या प्रशासनाचे उदाहरण! दोन दशकांहून अधिक सेवेत त्यांच्या तब्बल ४० वेळा बदल्या झाल्याचे वृत्त आहे, पण प्रत्येक नव्या पोस्टिंगवर त्यांनी त्याच धडाडीने काम केले. 2004 मध्ये न्यायालयीन वॉरंटनुसार तत्कालीन मध्य प्रदेश मुख्यमंत्री उमा भारती यांना अटक करण्याची जबाबदारीही त्यांनी पार पाडली. पुढे तुरुंगातील कथित VIP सुविधांपासून विविध अनियमिततांपर्यंत त्यांनी निर्भीड भूमिका घेतली. त्यांच्या कार्यपद्धतीवर वाद झाले, टीकाही झाली; पण त्यांची स्पष्टवक्ती आणि कर्तव्यनिष्ठ प्रतिमा कायम राहिली. खुर्ची बदलता येते, पोस्टिंग बदलता येते; पण अधिकाऱ्याचा प्रामाणिकपणा आणि धैर्य बदलीच्या आदेशाने हिरावून घेता येत नाही! म्हणूनच रूपा मोदगील यांना मिळालेली ‘लेडी सिंघम’ ही ओळख त्यांच्या संघर्षमय कारकिर्दीला सार्थ ठरते.
🔽
🖋️ *अभिजीत राणे लिहितात*
पुण्यात येऊन राजकीय आरोप-प्रत्यारोप करणाऱ्या राहुल गांधींनी एकदा नागपूरकडेही पाहावे! मुख्यमंत्री देवेंद्र फडणवीस यांच्या उपस्थितीत नागपूरच्या रेशीमबाग मैदानावर झालेल्या ‘मंथन4युवा’च्या समारोप सोहळ्याने तरुणाईच्या उत्साहाचा अक्षरशः इतिहास घडवला. तब्बल ४,१०० ढोल-ताशा वादकांनी एकाच वेळी केलेल्या भव्य वादनाने संपूर्ण परिसर दणाणून गेला, तर ५८५ ध्वजांची दिमाखदार उभारणी हे या सोहळ्याचे आणखी एक वैशिष्ट्य ठरले. या ऐतिहासिक कामगिरीची नोंद एशिया बुक ऑफ रेकॉर्ड्स, इंडिया बुक ऑफ रेकॉर्ड्स आणि वर्ल्ड रेकॉर्ड्स बुक ऑफ इंडियामध्ये झाल्याचे आयोजकांनी जाहीर केले. महाराष्ट्राची तरुणाई केवळ राजकीय भाषणांची श्रोता नाही; कौशल्य, संस्कृती, संघटन आणि सामूहिक ऊर्जेच्या बळावर नवे विक्रम घडविण्याची ताकद तिच्यात आहे, हा संदेश ‘मंथन4युवा’ने देशाला दिला!
🔽
🖋️ *अभिजीत राणे लिहितात*
युट्यूबर अजित भारती यांच्यावर SC/ST ॲट्रॉसिटी कायद्यांतर्गत गुन्हा दाखल झाल्याची चर्चा पुन्हा या कायद्याच्या कथित गैरवापराचा प्रश्न ऐरणीवर आणत आहे. लाइव्ह सेशनमध्ये एका व्यक्तीने भारतींना त्यांच्या बहिणीचे चंद्रशेखर यांच्याशी लग्न लावून देण्याची टिप्पणी केली. त्यावर बहिण विवाहित असल्याचे सांगत भारतींनी, “तुम्हीच तुमच्या बहिणीचे लग्न चंद्रशेखर यांच्याशी करा,” असे प्रत्युत्तर दिल्याचा दावा आहे. याच वक्तव्यावरून गुन्हा दाखल झाल्याचे सांगितले जात आहे. भारतींकडे न्यायालयीन लढाईसाठी आर्थिक साधने आणि वकील असतील; पण अशाच प्रकरणात एखादा सामान्य नागरिक अडकला तर त्याचे काय? कठोर कायदा वंचितांच्या संरक्षणासाठी आवश्यक असला, तरी त्याचा सूड, दबाव किंवा वैयक्तिक वादासाठी गैरवापर होऊ नये याची जबाबदारीही सरकारचीच आहे. न्याय म्हणजे पीडिताचे संरक्षण; निरपराधाला शिक्षा नव्हे!
🔽
🖋️ *अभिजीत राणे लिहितात*
बांगलादेशचे पंतप्रधान तारिक रहमान यांचा प्रस्तावित दिल्ली दौरा स्थगित होणे ही केवळ कार्यक्रमातील फेरबदलाची बाब नसून ढाकाच्या बदलत्या सामरिक भूमिकेचे संकेत मानले जात आहेत. भारताशी व्यापार, ऊर्जा, सुरक्षा आणि भौगोलिक हितसंबंध घट्ट जोडलेले असतानाही बांगलादेश चीनशी जवळीक वाढवताना दिसत आहे. दिल्लीपूर्वीच्या चीन दौऱ्यात तीस्ता प्रकल्पात बीजिंगची भूमिका तसेच म्यानमारमार्गे युन्नान-बांगलादेश रस्ते संपर्काच्या शक्यतांवर चर्चा झाल्याचे वृत्त आहे. त्याचवेळी शेख हसीना यांच्या प्रत्यार्पणाची मागणी आणि पाकिस्तान-तुर्किये-सौदी संरक्षण समीकरणाविषयी ढाक्यातील चर्चा भारताची चिंता वाढवणारी आहे. म्यानमारमधील अस्थिरतेमुळे प्रस्तावित कॉरिडॉर प्रत्यक्षात आणणे अवघड असले, तरी भारताच्या संवेदनशील ईशान्य सीमेच्या जवळ चीनचा वाढता सामरिक प्रभाव दुर्लक्षित करण्यासारखा नाही. दिल्लीपासून अंतर आणि बीजिंगशी जवळीक—ढाका नेमका कोणता नवा डाव खेळत आहे, हा प्रश्न आता महत्त्वाचा ठरतो.
🔽
🖋️ *अभिजीत राणे लिहितात*
होय, आवाज जरा कमीच हवा !!! DJ मुक्त आणि कमी ढोल पथक असलेला गणेशोत्सव हवा. लोकमान्य टिळक यांनी पहिल्यांदा जसा गणेशोत्सव सुरू केला, तसाच हवा आहे. गेल्या वर्षी सोलापूरच्या लोकांनी तसा साजरा केला. त्या सोलापूरकरांना माझा सलाम...पुण्यात जोपर्यंत डिजेमुक्त होणार नाही आणि खूप ढोल पथक असतील तेव्हा मला तरी गणेशोत्सव पहायचा नाही. गेल्या अनेक वर्षांपासून तसाही मी दूरच असतो. पण ढोलाच्या दणदणाटामुळे नीट झोप पण लागत नाही. खरोखर ज्या गोष्टीचा त्रास होत असेल ती गोष्ट बंद करणे किंवा त्याची पद्धत बदलणे कधीही योग्य....केवळ काही मंडळाच्या कार्यकर्त्यांसाठी इतर लोकांना त्रास का ???? यावर सर्वांनी बोलले पाहिजे. त्रास होतो तर बोला पुणेकर ! जनाधार असाच तयार होत असतो. जोर लावा आणि गणेशोत्सव छान शांततेत साजरा करा...गणपती बाप्पा मोरया !
🔽
Comments