🖋️ अभिजीत राणे लिहितात
- dhadakkamgarunion0
- 53 minutes ago
- 3 min read
🖋️ अभिजीत राणे लिहितात
नाशिक कुंभमेळा आणि व्यापक दृष्टिकोन
नाशिकचा कुंभमेळा २६ ऑक्टोबर २०२६ ते २८ जुलै २०२८ दरम्यान होणार असून यात ४२ ते ४५ पर्व स्नानांचे आयोजन आहे. कोट्यवधी भाविक आणि लाखो साधू-संन्यासींच्या आगमनामुळे आवश्यक इन्फ्रास्ट्रक्चर उभारणीचे काम युद्धास्तरावर सुरू आहे. यासाठी काही झाडे तोडण्याचा कार्यक्रम असून शासनाने जितकी झाडे कापली जातील त्याच्या दसपट देशी झाडे लावण्याची योजना जाहीर केली आहे. तरीही विरोधक पर्यावरणाच्या नावाखाली न्यायालयीन लढाईची तयारी करत आहेत. परंतु व्यापक कारण म्हणजे कुंभमेळा हा सनातन धर्माविषयी जागृती, अभिमान आणि सामाजिक एकतेचा महोत्सव आहे. प्रयागराजच्या महाकुंभामुळे उत्तर प्रदेशाच्या जीडीपीत मोठी वाढ झाली होती, तसेच नाशिक कुंभामुळे महाराष्ट्राच्या अर्थव्यवस्थेला चालना मिळेल. रोजगार, व्यवसाय आणि धार्मिक शिक्षणाच्या संधी निर्माण होतील. विरोधकांनी झाडांपलीकडे पाहून या मेळ्याचे सामाजिक-आर्थिक महत्त्व समजून घ्यावे.
🔽
🖋️ अभिजीत राणे लिहितात
शेतकरी आंदोलन आणि मिडियाची उदासीनता
मराठवाड्यातील बीड, परभणी आणि उस्मानाबाद जिल्ह्यांत ऊसदरवाढीसाठी शेतकरी रस्त्यावर उतरले आहेत. युट्यूबर्स, लोकल मिडिया आणि सोशल मीडियावर या आंदोलनाची चर्चा जोरात आहे, पण मेनस्ट्रीम मराठी मिडिया मात्र याकडे दुर्लक्ष करत आहे. दुर्दैवी घटना घडल्यावरच मिडिया भांडवल करतो, पण संघर्षाच्या वेळी शेतकऱ्यांची बाजू मांडायला कोणी पुढे येत नाही. ऊसाबरोबरच सोयाबीनसारख्या पिकांमध्येही शेतकऱ्यांना तोटा सहन करावा लागतो. बाजारभाव ४६०० रुपये तर MSP ५३२८ रुपये असूनही विक्रीत अडथळे येतात. व्यापाऱ्यांना मात्र सरकारी केंद्रांवर विक्रीसाठी मोकळा मार्ग असतो. अशा परिस्थितीत शेतकऱ्यांनी आंदोलन करणे अपरिहार्य आहे. योग्य भावासाठी लढणे ही त्यांची गरज आणि हक्क आहे. मिडियानेही या संघर्षाची दखल घेऊन शेतकऱ्यांचा आवाज पोहोचवणे हीच खरी जबाबदारी आहे.
🔽
🖋️ अभिजीत राणे लिहितात
भीतीचे राजकारण आणि मुस्लिम समाज
परळीतील प्रचारसभेत खासदार बजरंग सोनवणे यांनी RSS चा मुद्दा उचलला, हेच दाखवते की काही पक्ष मुस्लिम मतदारांना फक्त भीती दाखवून एकगठ्ठा मतदान करवून घेतात. पण या भीतीच्या राजकारणातून मुस्लिम समाजाचा विकास कधीच झाला नाही. शहरातील मुस्लिम वस्त्या आणि इतर भागांची तुलना केली तर दृष्टीस पडते की मूलभूत सुविधा, रोजगार आणि शिक्षणात मोठी दरी आहे. यात मुस्लिम समाजही जबाबदार आहे कारण भाजपविरोधाच्या नावाखाली ते काँग्रेससारख्या पक्षांनी दिलेल्या उमेदवारालाच निवडून देतात. निवडून आलेला नेता पुढच्या निवडणुकीतच परत येतो, कारण त्याला माहिती असते की भाजपची भीती दाखवली की मते मिळतात. मुस्लिम समाजाला जनाधार असलेला नेता नाही, आणि कदाचित हेच चांगले आहे कारण वेगळेपणाच्या राजकारणाऐवजी विकासावर लक्ष केंद्रित होणे गरजेचे आहे.
🔽
🖋️ अभिजीत राणे लिहितात
महायुतीचा जमिनीवरील प्रचार आणि विरोधकांची उदासीनता
२ डिसेंबरला होणाऱ्या नगरपरिषद निवडणुकांसाठी महाराष्ट्रात महायुतीचे नेते थेट गल्लीबोळात उतरले आहेत. मुख्यमंत्री देवेंद्र फडणवीस, उपमुख्यमंत्री अजित पवार आणि एकनाथ शिंदे यांच्यासह कॅबिनेट मंत्री, आमदार आणि पदाधिकारी आपल्या प्रभावक्षेत्रात तळ ठोकून प्रचार करत आहेत. याउलट महाविकास आघाडीचे नेते मतदारांनाच काय, उमेदवारांनाही फारसे दिसले नाहीत. अशा परिस्थितीत निकाल महायुतीच्या बाजूने लागणे स्वाभाविक ठरेल. मात्र पराभवानंतर विरोधक ईव्हीएम, मतचोरी यावर आरोप करून जबाबदारी टाळतील, हेही तितकेच निश्चित आहे. लोकांपर्यंत पोहोचून त्यांचा विश्वास जिंकणे ही खरी निवडणूक असते. जमिनीवरचा संघर्ष आणि थेट संवाद हेच विजयाचे सूत्र आहे, आणि महायुतीने ते दाखवून दिले आहे.
🔽
🖋️ अभिजीत राणे लिहितात
नक्षलवादाचा ऑक्टोपस आणि शहरी जाळे
भारतीय नक्षलवाद हा समाजरचनेचा गळा आवळणारा ऑक्टोपस ठरला आहे. जंगलातील सशस्त्र नक्षलवाद्यांवर पोलिसांनी हिडमा मडावी, किशनदा यांसारख्या कुख्यातांना ठार केले किंवा अटक केली, त्यामुळे त्यांचे मनोबल ढासळले आहे. पण शहरी नक्षलवाद कला, साहित्य, पत्रकारिता, समाजकारण या क्षेत्रांत अजूनही सक्रिय आहे. एल्गार परिषद, कबीर कला मंच, समता मंच यांसारख्या संघटनांतून जमावाला चिथावणी देणे, तपासाचे बोट भलत्याच व्यक्तीकडे वळवणे ही त्यांची रणनीती आहे. मिलिंद तेलतुंबडे, गदर यांसारख्या व्यक्तींनी सांस्कृतिक मंचांद्वारे तरुणांना आकर्षित केले. या विचारसरणीचा उद्देश लोकशाही व्यवस्थेला कमकुवत करणे आणि हिंसाचाराला वैचारिक आधार देणे हा आहे. जंगलातील सैन्य संपल्यावर शहरी नक्षलवाद्यांचे प्रयत्न न्यायालयीन अडथळे, आंदोलन आणि दंगली घडवण्यापुरते मर्यादित राहतील. समाजाने या ऑक्टोपसच्या हातांना ओळखून सावध राहणे गरजेचे आहे.
🔽
Comments