नेक्स्ट जेन जी एस टी सुधारणा – आत्मनिर्भरतेचा शंखनाद !!!

🖋️🖋️विशेष संपादकीय🖋️🖋️

.................................

.................................

अभिजीत राणे

नेक्स्ट जेन जी एस टी सुधारणा – आत्मनिर्भरतेचा शंखनाद !!!

डोनाल्ड ट्रंप यांनी 50 % टेरिफ लावल्याने भारताच्या उद्योग जगताला निश्चितच धक्का बसला होता. आणि त्यामुळे भारत सरकारने पुढाकार घेऊन अन्य देशांशी मुक्त व्यापार करार करून उद्योजकांना इतर देशांच्या बाजारपेठा मिळाव्या असे नियोजन केले होते. परंतु याच्या जोडीला उद्योजकांना देशांतर्गत बाजारपेठेत सुद्धा दिलासा दिला जाणे अत्यंत आवश्यक होते आणि त्या दृष्टीनेच सरकारने दिवाळीच्या दीड महीने आधी मास्टर स्ट्रोक मारला आहे.

दिवाळी हा प्रकाशाचा सण. पण या वर्षी दिव्यांचा उजेड केवळ घराघरातच नाही, तर भारताच्या अर्थकारणातही झळकावा असेच नियोजन मोदीजींनी केले आहे. पंतप्रधान नरेंद्र मोदी आणि वित्तमंत्री निर्मला सीतारामन यांनी घेतलेल्या ऐतिहासिक निर्णयामुळे आज देशातील प्रत्येक कुटुंबाला नवा दिलासा मिळणार आहे. नेक्स्ट-जेन जीएसटी सुधारणा ही केवळ कररचनेतील बदल नाही; ती एक सामाजिक-आर्थिक क्रांती आहे.

गेल्या काही वर्षांपासून नागरिकांना आणि उद्योगांना जीएसटीच्या गुंतागुंतीत अडकून रहावे लागत होते. चार-चार वेगवेगळ्या दरांमुळे गोंधळ, दैनंदिन वस्तूंवर उच्च कर, शेतकऱ्यांवर वाढलेला खर्च आणि उद्योगांसाठी स्पर्धात्मक अडथळे—ही वास्तवता होती. मोदी सरकारने त्या सगळ्याला छेद दिला आहे. आता संपूर्ण कररचना दोन सोप्या केल्या आणि केवळ दोन दरांत संपूर्ण संरचना मांडली आहे आता हे दर आहेत ५ आणि १८ टक्के. तर विलासी आणि हानिकारक वस्तूंवरील उच्चकर कायम ठेवण्यात आला आहे. ही रचना म्हणजे साधेपणाचा आणि जबाबदारीचा उत्तम मेळ आहे.

या सुधारणेचा सर्वात मोठा परिणाम घराघरात जाणवेल. शॅम्पू, साबण, टूथपेस्ट, ब्रश यांसारख्या रोज लागणाऱ्या वस्तूंचे दर कमी होतील. बटर, चीज, नमकीन, भुजिया यांसारख्या खाद्यपदार्थांचा खर्च कमी होईल. मुलांसाठी लागणाऱ्या वह्या, पेन्सिली, रबर यावरून कर हटल्याने शिक्षण स्वस्त होईल. गृहिणींच्या स्वयंपाकघरातही फीडिंग बॉटल्स, डायपर्स, भांडी यामुळे खर्चाचा ताण हलका होईल. आरोग्य विम्यावरील कर हटल्याने विमा स्वस्त होईल आणि सामान्य नागरिकाला आरोग्याचा आधार मिळेल. थर्मामीटरपासून ते तपासणी किट्सपर्यंत सर्व काही आता परवडेल. ही स्वस्ताई केवळ आकड्यांतील घट नाही, तर सामान्यांच्या चेहऱ्यावर हास्य फुलवणारी स्वस्ताई असणार आहे.

शेतकऱ्यांसाठी तर हा बदल एका नव्या युगाची सुरुवात आहे. ट्रॅक्टर, टायर्स, ड्रिप सिंचन, जैविक कीटकनाशके या सर्वांवरील कर निम्म्याहून कमी झाला आहे. शेतकऱ्यांचा उत्पादन खर्च घटणार आहे आणि उत्पन्नवाढीचा मार्ग खुला होणार आहे. कमी खर्चात आधुनिक साधने शेतकऱ्यांना मिळणार असल्याने शेती अधिक सक्षम होईल. हा बदल केवळ शेतकऱ्यांच्या जीवनमानात सुधारणा करणार नाही, तर भारताच्या अन्नसुरक्षेला आणि आत्मनिर्भरतेलाही बळकट करेल.

मध्यमवर्गीय कुटुंबांसाठी या सुधारणेचे महत्त्व वेगळे आहे. एसी, टीव्ही, प्रोजेक्टर, वॉशिंग मशीन यांसारख्या इलेक्ट्रॉनिक वस्तूंवरील कर घटल्याने दिवाळीत अनेकांचे स्वप्न पूर्ण होईल. दोनचाकी आणि लहान गाड्यांचे दर कमी झाल्याने तरुणाईच्या आकांक्षा पूर्ण होतील. आजवर “कधी घेऊ” असा प्रश्न विचारणारा मध्यमवर्ग आता आत्मविश्वासाने खरेदी करेल.

मोदी सरकारने हा निर्णय केवळ ग्राहकांसाठी घेतलेला नाही, तर तो उद्योगजगतासाठीही नवी उभारी आहे. उत्पादनासाठी लागणाऱ्या उपकरणांवरील करकपात झाल्याने भारतातील उद्योग स्पर्धात्मक होतील. आयातीवर अवलंबित्व कमी होईल आणि “मेक इन इंडिया”ला नवा वेग मिळेल. अधिक रोजगारनिर्मिती, अधिक उत्पादन आणि अधिक निर्यात—हा त्याचा नैसर्गिक परिणाम आहे.

जगात आज व्यापारयुद्धाचे वारे वाहत आहेत. अमेरिका चीनवर प्रचंड टॅरिफ लादते, भारतावरही कधी दडपण आणते. पण अशा वेळी मोदी सरकारने घेतलेला हा निर्णय दूरदृष्टीचा आहे. या सुधारणेमुळे सरकारला महसुलात तात्पुरता तोटा होईल, पण देशांतर्गत मागणी इतकी वाढेल की त्याचा परिणाम जीडीपीच्या वाढीत होईल. या सुधारणेमुळे भारताचे जागतिक व्यापार चर्चेतले स्थान अधिक मजबूत होईल. “जी एस टी 2.0” उद्योगांना खरोखर दिलासा घेऊन आला आहे.

ही सुधारणा केवळ करदरांपुरती मर्यादित नाही. प्रक्रियेतही पारदर्शकता आली आहे. तीन दिवसांत नोंदणी, पारदर्शक रिफंड, आणि वाद मिटवण्यासाठी अपीलीय न्यायाधिकरण—या सगळ्यामुळे उद्योगांना नवा आत्मविश्वास मिळतो आहे. भ्रष्टाचार आणि लालफितशाहीवर मोठा आघात झाला आहे.

महत्त्वाचे म्हणजे या सुधारणेमुळे सरकारला महसुलात काहीसा तोटा होणार आहे, पण तरीही पंतप्रधान मोदी आणि वित्तमंत्री सीतारामन यांनी लोकांना प्राधान्य दिले आहे. राज्यांना होणाऱ्या तोट्याची भरपाई केंद्र सरकार करणार आहे. म्हणजे हे सुधारणा सर्वांना मान्य आणि स्वीकारार्ह ठरतील. हीच खरी दूरदृष्टी—महसूल तात्पुरता कमी होऊ दे, पण दीर्घकाळात जनता सुखी झाली की अर्थव्यवस्था अधिक बळकट होईल.

दिवाळीचा दिवा अंधार दूर करतो, पण या वेळी मोदी सरकारने पेटवलेला दिवा हा आर्थिक अंधार दूर करणारा आहे. गरीब विद्यार्थ्याला स्वस्त पेन्सिल मिळणे, शेतकऱ्याला स्वस्त ट्रॅक्टरचे टायर मिळणे, गृहिणीला स्वस्त शॅम्पू मिळणे, रुग्णाला स्वस्त औषध तपासणी किट मिळणे—या सर्वांच्या चेहऱ्यावर उमटणारे हसू म्हणजे मोदी सरकारच्या सुधारणेचा खरा प्रकाश आहे.

नेक्स्ट-जेन जीएसटी सुधारणा ही फक्त करकपात नाही, तर ती मानवतेचा विजय आहे, उद्योगांचा विश्वास आहे आणि आत्मनिर्भर भारताचा शंखनाद आहे. मोदी आणि निर्मला सीतारामन यांनी दिलेला हा दिवाळीचा उपहार म्हणजे स्वस्ताईचा उत्सव, उद्योगजगताचा आत्मविश्वास आणि जगाला भारताची ताकद दाखवणारी घोषणा. इतिहासात हा टप्पा सुवर्णाक्षरांनी लिहिला जाईल. कारण हा निर्णय कराचा नाही, तर करुणेचा आहे; महसुलाचा नाही, तर जनतेच्या दिलाशाचा आहे; आणि केवळ आकड्यांचा नाही, तर भारताच्या आत्मविश्वासाचा आहे.

www.abhijeetrane.in

www.mumbaimitra.com

#NextGenGST #EconomicReform #SelfReliantIndia #ModiGovernment #NirmalaSitharaman #TaxReform #MakeInIndia #MiddleClassRelief #FarmersFirst #EaseOfDoingBusiness #IndiaRising #NewIndia #DiwaliGift #GST2point0 #GrowthAndProsperity