🖋️ अभिजीत राणे लिहितात
- dhadakkamgarunion0
- Aug 28
- 3 min read
🖋️ अभिजीत राणे लिहितात
“शहरी विकासासाठी आजचे निर्णय, उद्याचे सुवर्ण भविष्य”. शहरांचे भविष्य म्हणजे केवळ उंच इमारती वा झगमगते रस्ते नव्हेत, तर पुढील पन्नास वर्षांसाठी सुरक्षित, सक्षम आणि सर्वसमावेशक नियोजन होय. मुख्यमंत्री देवेंद्र फडणवीस यांनी मंत्रालयात घेतलेल्या बैठकीत याच दृष्टिकोनातून अचूक दिशा दिली. मलनिस्सारण, ड्रेनेज, घनकचरा व्यवस्थापन आणि पाणीपुरवठा यांसारख्या मूलभूत सेवांशिवाय शहरी प्रगतीची कल्पना देखील अशक्य आहे. केवळ निधी वाटप पुरेसे नाही, तर संसाधनांचे सुयोग्य नियोजन, स्थानिक स्वराज्य संस्थांना आर्थिक सहाय्य आणि बांधलेल्या सुविधांचे काटेकोर मॉनिटरिंग ही खरी कळीची तत्त्वे आहेत. शहरीकरण ही सामाजिक आणि आर्थिक विकासाची गती आहे. त्यामुळे प्रकल्प अर्धवट राहू नयेत, निधीअभावी थांबू नयेत आणि नागरिकांना भविष्यातील अडचणींना तोंड द्यावे लागू नये, यासाठी फडणवीस सरकारने दीर्घकालीन आराखड्याची दिशा दाखवली आहे. जागतिक बँकेच्या प्रतिनिधींच्या उपस्थितीत झालेली ही बैठक महाराष्ट्राच्या शहरांना जागतिक दर्जाचे भविष्य घडविण्याची नांदी ठरते, यात शंका नाही.
🔽
🖋️ अभिजीत राणे लिहितात
“काँग्रेस : गांधी कुटुंबाची खासगी मालमत्ता”
कर्नाटकात घडलेल्या दोन घटनांनी काँग्रेसचा खरा चेहरा पुन्हा उघड केला आहे. उपमुख्यमंत्री डी.के. शिवकुमार यांनी विधानसभेत योगायोगाने राष्ट्रीय स्वयंसेवक संघाच्या प्रार्थनेच्या दोन ओळी उच्चारल्या आणि काँग्रेसमध्ये भूकंपच झाला. थेट माफी मागावी लागली आणि “गांधी कुटुंब हेच माझे देव” अशी घोषणा करावी लागली. दुसरीकडे, मंत्री के.एन. राजन्ना यांनी राहुल गांधींच्या निवडणूक आयोगावरील वक्तव्याला विरोध केला, इतकेच कारण पुरेसे ठरले आणि त्यांचा तत्काळ राजीनामा घेतला गेला. अनुभवसंपन्न, मागासवर्गीय समाजातून आलेले आणि मुख्यमंत्री सिद्धरामय्यांचे निकटचे मानले जाणारे नेते असूनही त्यांना क्षमा मिळाली नाही. या दोन घटनांमधून स्पष्ट होते की काँग्रेस पक्ष हा आता कोणताही राष्ट्रीय पक्ष राहिला नसून गांधी कुटुंबाची खासगी मालमत्ता बनला आहे. इथे लोकशाही नाही, भक्ती आहे; इथे विचार नाही, गुलामी आहे. मोदी वारंवार म्हणतात तसेच — देशातील विरोधक म्हणजे फक्त परिवारवादी पक्षांचा समूह!
🔽
🖋️ अभिजीत राणे लिहितात
“कामिल्याचा कट – हिंदूंच्या रक्तावर राजकारण”. बांगलादेशातील कामिला येथे घडलेली घटना ही केवळ एक दंगल नव्हती, तर योजनाबद्ध नरसंहाराचा कट होता. दुर्गामातेच्या मूर्तीपाशी कुराण ठेवून हिंदूंवर ईशनिंदेचा खोटा आरोप लावण्यात आला आणि ५०० हून अधिक हिंदू घरे जाळली गेली, २३ निरपराधांचा बळी गेला. सीसीटीव्हीने सत्य उघड केले—एक मुस्लिम तरुण कुराण ठेवताना स्पष्ट दिसला. चौकशीत उघड झाले की बहारुद्दीन नावाच्या कट्टरपंथ्याने पन्नास हजार रुपयांत हा कट रचला. पण तो पाच वर्षे गायब होता. आता तो कोलकात्यात भारतीय कागदपत्रांसह ऐटीत राहताना सापडला! हे केवळ भारताच्या सुरक्षेचे अपयश नाही, तर छुप्या घुसखोरीचे भयावह उदाहरण आहे. हिंदूंच्या नरसंहाराचे षड्यंत्रकर्ते आपल्या शहरात सहजपणे राहू शकतात, हे किती मोठे लज्जास्पद आहे! प्रश्न उभा राहतो—आपल्या शासनयंत्रणा हिंदूंच्या सुरक्षेच्या बाबतीत इतक्या निष्क्रिय का? अपराध्यांचे रक्षण आणि हिंदूंचे बळी — हे फार काळ चालणार नाही.
🔽
🖋️ अभिजीत राणे लिहितात
“ट्रम्पचा टेरिफ आणि जगाचा विरोध” २०१६ मध्ये अमेरिकेत आलेल्या कायद्यानुसार ८०० डॉलर्सपर्यंतची पोस्टल डाक कोणत्याही शुल्काशिवाय परदेशातून येऊ शकत होती. यामुळे जगभरातील नागरिकांना आपल्या कुटुंबीयांना मदत किंवा वस्तू सहज पाठवणे शक्य झाले होते. मात्र आता डोनाल्ड ट्रम्प प्रशासनाने हा सवलतीचा दर रद्द करून उलट प्रचंड शुल्क लावण्याचा निर्णय घेतला आहे. शंभर डॉलर्सच्या वस्तूवर तब्बल दोनशे डॉलर्स शुल्क म्हणजे दुप्पट भार! याला निषेध म्हणून जर्मनी, फ्रान्स, इटली, ब्रिटन, जपान, दक्षिण कोरिया, सिंगापूर, ऑस्ट्रेलिया, न्यूझीलंड, तैवान आणि भारतासह डझनभर देशांनी अमेरिकेविरोधात आपली पोस्टल सेवा बंद केली आहे. ट्रम्प म्हणतात, “शुल्क घेऊन अमेरिकन तिजोरी भरणार” पण प्रश्न एवढाच—लोक पाठवतील तरी काय, जर दुप्पट खर्चच करावा लागणार असेल? हा निर्णय अमेरिकेच्या संरक्षणवादाचा आणखी एक उग्र चेहरा आहे आणि त्याने जागतिक व्यापार व्यवस्थेत असंतोष निर्माण होणार हे निश्चित.
🔽
🖋️ अभिजीत राणे लिहितात
“मोदींचा दिलासा – छोट्या उद्योजकांचे सरकार”
अहमदाबादच्या भूमीवरून पंतप्रधान नरेंद्र मोदी यांनी दिलेला संदेश हा केवळ भाषण नव्हे तर छोट्या उद्योजक, दुकानदार, शेतकरी आणि पशुपालकांसाठी आश्वासनाचा दस्तऐवज आहे. जगभरात स्वार्थी राजकारणाचे सावट गडद होत असताना मोदी स्पष्टपणे म्हणतात की “तुमचे हितच माझे ध्येय आहे.” जागतिक व्यापारातील उलथापालथ, मोठ्या कंपन्यांच्या वर्चस्वामुळे लहान व्यावसायिकांवर संकट ओढवते, पण मोदी सरकारने गेल्या दशकभरात त्यांचे संरक्षण करण्याची हमी दिली आहे. आत्मनिर्भर भारताच्या संकल्पनेत याच वर्गाला केंद्रस्थानी ठेवण्यात आले आहे. मोदींचे शब्द म्हणजे जनतेला दिलासा, की कोणतेही आंतरराष्ट्रीय दबाव किंवा अंतर्गत आव्हाने आली तरी त्यांच्या हिताला तडा जाऊ दिला जाणार नाही. या विश्वासामुळेच लहान दुकानदारापासून शेतकऱ्यापर्यंत प्रत्येकजण म्हणतो—मोदी आहेत, म्हणून आपले भविष्य सुरक्षित आहे.
🔽
Comments