महाराष्ट्राचे डिजिटल मिडिया धोरण जाहीर व्हावे... यासाठी पाठपुरावा!

धडक कामगार युनियनचे संस्थापक महासचिव कामगार नेते अभिजीत राणे यांची विशेष अतिथी म्हणून उपस्थिती

संघटनेच्या मुंबईतील बैठकीत राजा माने यांची माहिती

राजस्थान सरकारप्रमाणेच महाराष्ट्र सरकारनेही डिजिटल मिडिया धोरण लागू करावे, यासाठी संघटनेच्या माध्यमातून सातत्याने प्रयत्न सुरू असल्याची माहिती डिजिटल मिडिया संपादक पत्रकार संघटनेचे अध्यक्ष राजा माने यांनी दिली. मुंबईच्या मालाड येथील राजोरा बँक्वेट हॉल येथे राजा मानेयांच्या प्रमुख उपस्थितीत आज मुंबई शहर व उपनगरातील संघटनेच्या पदाधिकाऱ्यांची बैठक संपन्न झाली. या कार्यक्रमास धडक कामगार युनियनचे संस्थापक महासचिव कामगार नेते अभिजीत राणे यांनी विशेष अतिथी म्हणून उपस्थित राहून राजा माने यांना वाढदिवसाच्या शुभेच्छा दिल्या.

या बैठकीत मार्गदर्शन करताना माने यांनी संघटनेचा इतिहास, राज्यभर वाढलेली व्याप्ती, पत्रकारांच्या कुटुंबियांसाठी सुरू करण्यात आलेल्या प्रतिबिंब प्रतिष्ठानची माहिती दिली. तसेच, संघटनेच्या 6 एप्रिल रोजी होणाऱ्या अधिवेशनासह संघटनेची पुढील दिशा सांगितली.

डिजिटल मिडिया संपादक पत्रकार संघटनेच्या मुंबई विभागाचे अध्यक्ष संजय भैरे यांच्या नेतृत्वात मुंबईत कार्यरत असलेल्या डिजीटल मिडिया पत्रकार व संपादकांच्यावतीने राजा माने यांचा वाढदिवस साजरा करण्यात आला. यावेळी, अनेक मान्यवर व स्थानिक पत्रकार उपस्थित होते.

याप्रसंगी बोलताना, माने यांनी डिजिटल मिडिया धोरण व प्रतिबिंब प्रतिष्ठानबद्दल माहिती दिली. आपल्या संघटनेचा पत्रकार कुटुंबवत्सल असला पाहिजे, उद्योगी (व्यवसायिक) असला पाहिजे, पण खंडणीखोर अजिबात असता कामा नये. कारण, संघटनेच्या माध्यमातून डिजिटल मीडियातील पत्रकारांना आता कुठे प्रतिष्ठा मिळत आहे, समाजमान्यता मिळत आहे, शासन मान्यताही लवकरच मिळेल. त्यासाठी, संघटनेचे सर्व पदाधिकारी जोमाने तालुका ते मंत्रालय स्तरावर धडक देत आहेत. संघटनेचा अध्यक्ष मी असलो तरी संघटनेचं काम हे आपण, आम्ही म्हणूनच पुढे जात आहे. संघटनेचा प्रत्येक घटक इथे महत्त्वाचा आहे. त्याच माध्यमातून, डिजिटल मिडिया धोरण राबवण्यासाठी आपण पाठपुरावा करत असल्याचे मानेसाहेबांनी सांगितले.